സംസ്ഥാനത്തിന്റെ വിവിധ ഭാഗങ്ങളിൽ ബ്രസീൽ, അർജന്റീന തുടങ്ങിയ പ്രമുഖ ടീമുകളുടെ ആരാധകർ സ്ഥാപിച്ച കൂറ്റൻ ഫ്ലെക്സ് ബോർഡുകളിലാണ് കായിക താരങ്ങളും മറ്റും ചുരുട്ട് ഉൾപ്പെടെയുള്ള പുകയില ഉൽപ്പന്നങ്ങൾ ഉപയോഗിക്കുന്ന ചിത്രങ്ങൾ വ്യാപകമായി ഉൾപ്പെടുത്തിയിരിക്കുന്നത്. ലോകകപ്പ് ആവേശത്തിന്റെ മറവിൽ ഇത്തരം ചിത്രങ്ങൾ ഉപയോഗിക്കുന്നത് ശ്രദ്ധയിൽപ്പെട്ടതിനെ തുടർന്നാണ് ആരോഗ്യവകുപ്പിന്റെ അടിയന്തര ഇടപെടൽ.
പൊതുഇടങ്ങളിൽ പുകവലിയും പുകയില ഉൽപ്പന്നങ്ങളുടെ ഉപയോഗവും പ്രോത്സാഹിപ്പിക്കുന്ന തരത്തിലുള്ള ഫ്ലെക്സ് ബോർഡുകളും പരസ്യങ്ങളും പ്രദർശിപ്പിക്കുന്നത് നിയമവിരുദ്ധമാണ്. കായിക താരങ്ങളെ മാതൃകയാക്കുന്ന യുവാക്കൾക്കും കുട്ടികൾക്കും ഇത്തരം ചിത്രങ്ങൾ തെറ്റായ സന്ദേശം നൽകുമെന്നും വിലയിരുത്തപ്പെടുന്നു.
നിയമലംഘനം നടത്തുന്ന ഫ്ലെക്സ് ബോർഡുകൾ ഉടനടി നീക്കം ചെയ്യാനും ഇതിന് പിന്നിൽ പ്രവർത്തിച്ചവർക്കെതിരെ നടപടി സ്വീകരിക്കാനുമാണ് തദ്ദേശസ്ഥാപനങ്ങൾക്ക് നൽകിയിരിക്കുന്ന നിർദ്ദേശം. വരും ദിവസങ്ങളിൽ ഇക്കാര്യത്തിൽ കർശന പരിശോധനകൾ ഉണ്ടാകുമെന്നാണ് സൂചന.
