മൂന്നാം വാർഡിലെ ചീനിക്കൽ, കണ്ടാലപ്പറ്റ, വെസ്റ്റ് ചീനിക്കൽ, കല്ലിങ്ങൽ തുടങ്ങിയ ഭാഗങ്ങളിലാണ് ഇത്തരം കയ്യേറ്റങ്ങൾ വ്യാപകമായിട്ടുള്ളത്. റോഡിലേക്ക് ഇറക്കി കെട്ടിയ മതിലുകൾ, ഗതാഗതത്തിന് തടസ്സമാകുന്ന രീതിയിൽ റോഡിലേക്ക് തുറക്കുന്ന ഗേറ്റുകൾ എന്നിവ അടിയന്തരമായി നീക്കം ചെയ്യണമെന്ന് പരാതിയിൽ ആവശ്യപ്പെട്ടിരുന്നു.
കൂടാതെ, മഴവെള്ളം ഒഴുകിപ്പോകുന്ന ഡ്രൈനേജുകൾ പൂർണ്ണമായും മൂടുന്ന രീതിയിൽ നിർമ്മിച്ച റാമ്പുകളും വലിയ പ്രതിസന്ധിയാണ് സൃഷ്ടിക്കുന്നത്. ഇത്തരം റാമ്പുകൾ പൊളിച്ചുമാറ്റണമെന്നും, മഴവെള്ളം റോഡിലേക്ക് കുതിച്ചൊഴുകാതെ ഡ്രൈനേജിലൂടെ തന്നെ സുഗമമായി ഒഴുകിപ്പോകാൻ ഉടമസ്ഥർ സ്വന്തം നിലയ്ക്ക് പൈപ്പുകൾ സ്ഥാപിക്കണമെന്നും നാട്ടുകാർ ആവശ്യപ്പെട്ടു.
പരാതിയുടെ അടിസ്ഥാനത്തിൽ, റോഡിലേക്കുള്ള കയ്യേറ്റങ്ങൾ എത്രയും വേഗം നീക്കം ചെയ്യാൻ തൃക്കലങ്ങോട് പഞ്ചായത്ത് പ്രസിഡന്റ് നിർദേശിച്ചു. ഈ നിർദേശം സമയബന്ധിതമായി പാലിക്കാത്ത പക്ഷം, ബന്ധപ്പെട്ടവർക്ക് നോട്ടീസ് നൽകി നിയമപരമായ തുടർനടപടികൾ സ്വീകരിക്കുമെന്നും പ്രസിഡന്റ് മുന്നറിയിപ്പ് നൽകി.
